Dreidubbelt Haug up Henning Rehbaum!

Ein neues Lied, zu singen nach der alten Weise vom Sanitätsgefreiten Neumann

24.07.2014, 10:01 Uhr | Westfälische Nachrichten 19.07.2014

Dreidubbelt Haug! Dreidubbelt Haug!

Dreidubbelt Haug för Henning Rehbaum,
den uut Auhlen,
well äs EM-DE-EL
vüör‘t Parlament dai plattdüütsk küern.
Nümmsnich konn em dao an hinnern.
Alle mossen sick blaots wünnern.
Un de Landdagsstenograph
schreef alls met, akraot un brav.
Dreidubbelt Haug för Henning Rehbaum,
den uut Auhlen,
well äs EM-DE-EL
Zivilcourage hät bewiësen.
Platt dööt viële Lüü schanneren;
män em konn dat nich passeren.
Henning küerde driest, alatt
met de auhlske Mule Platt.
 

Dreidubbelt Haug för Henning Rehbaum,
den uut Auhlen,
well äs EM-DE-EL
un Mönsterlänner an dat Pult gonk.
He wull dao den Andrag stellen,
dat se Geld uutgiëwen söllen
för dat schöne, aolle Platt.
Män de Landdag dreet em wat.
Dreidubbelt Haug för Henning Rehbaum,
den uut Auhlen,
well äs EM-DE-EL
auk för Westfaolen vüör dat Huus stonn.
‚t Rhienland dööt jä us Westfaolen
faak för‘n lück eenpäössig haollen.
Henning mook de Lüde klaor:
We dat mennt, is sölwer daor.
Dreidubbelt Haug för Henning Rehbaum,
den uut Auhlen,
well äs EM-DE-EL
den Wäert van Plattdüütsk hätbegriëppen.
Düsse Spraoke mott bestaohen
bliewen, draff nich unnergaohen,
auk, wann Gröne, SPD
säggt to Hennings Andrag Nä!
Dreidubbelt Haug för Henning Rehbaum,
den uut Auhlen,
well äs EM-DE-EL
en grauten Bifall sick verdent hät.
Plattdüütsk snacken, küern, praoten
un et nich verkuommen laoten,
auk wann Stenographen jankt!

Henning Rehbaum, si bedankt!

Hannes Demming

 

 Wörde:

dreidubbelt – dreifach; Au(h)len – Ahlen; EM-DE-EL – MDL, Mitglied des Landtages; nümms(nich) – niemand; driest – unbekümmert; alatt – munter; au(h)lsk – aus Ahlen; dreet – Präteritum von „drieten“ (schei . . . ); faak – oft; eenpäössig – einfältig; daor – töricht; janken – stöhnen, jammern